Hebrews 2
Minam Tebeng Lolos Lunuunu Atnimi
1Nitna ne Moroa ga raba dik mi loklox arooro, kuren la minam tebeng lolos lunuunu atnimi mumu mo levenanasa miga ronga ka vam i, kusu mi noxo soogong basinge mo lunuunu. 2Lubung angelo diga raba ne Moses mi Lenavolo la ixo epovo do tara na los polo i. Do nege ga ronga xepe i xopla goxo mu asu i, neni ga ba lok ka losongsongot ga epovo at loklok teren. 3La kerepmo bok do nedik ata ronga xepe Lagale Lavavang, ixo epovo do nedik taba sepsu basinge lebelemamao at ne Moroa. Leeme Silok neni avot ga ru ka lavavang at langas ti loklox arooro, la nedi luvuttadi vavang diga ronga xaka mo levelinga ren, la diga lox aruturun i ridik. 4Moroa ga lox asuusu box i do mo levelinga ren i ruturun mi leveloklok katling la levempanga sangsangu la leventamtaba at Loroonan Kaala, ne Moroa gara epes pam limixin teren min, ga epovo at lavavara ren.Iesu Ga Ravasu Ngan Limixin
5Moroa goxo lok li lubung angelo xusu dibam gomgo ri limixin ap mo lemenemen move naba vot melemu, na nema ma paase mumu i. 6Ketla limixin at ne Moroa dibam gomgo ri lavanga axap kerekngan lara ga tong i keneng at Lovoang Kaala; i lok keretna,“Ua lavasuun teren la nenu ne Moroa u doxoma mu solo limixin, la labalam ik lok mu laxamdak atdi? 7Nenu uga raba limixin mi levenasen silok, ketla ik lok maxopok kakalik at lubung angelo, la uga lox anarong di mi lixitkis silok kusu diba ruuna ka leemi asu la loklok ngangao. 8Uga tong li i do una lox asilok di xusu diba lok tatao mo levempanga axap.” a
Ne Moroa ga lok li levempanga axap maxopok at loklok tatao atdik, kopmen goxo ke xepe tavanga. Na lingina kovisi nedik ata ven i do levempanga ik lok maxopok at loklok tatao atdik. 9Ketla nedik ata ven kibis i do ne Iesu neni ga ruuna lixitkis silok tinedi lubung angelo, la ne Moroa ga lox asi lixilik mun i maxopok atdi xusu na xip lumumuat at lanmet ti lox asuusu lodoxoma at ne Moroa do limixin axap diba lok ka lorooro avolo. Kuren la lingina Iesu ira lok ka vam lixitkis silok la limixin di lok ngangao ren.
10Gak mokso do ne Moroa, neni ga rudum li levempanga axap la i lok tatao bok di, do neni na ke xepe ne Iesu xusu neni na xip laxasongsongot kusu na lox agagas avukat ti lugugu ren. Kuren la neni ga ruuna ka laasen do Lamgomgo at langas ti loklox arooro la ga lok ka bok buaang limixin kusu dina ruuna ka loklox arooro. 11Ne Iesu eburu minedi limixin ni ga lox adadat di, dik lok keneng at legesa xitkis koetemen. Kerepmo la ne Iesu neni i lok momo aleng ti tong di do luvutneton. 12Neni ga lok ti ne Moroa,
“Nenia anaba tong asu laasen taram ti luvutnetak la anabak pixan emi asu minu ro melamgo at lovotpot buru atdi.” b
13La ne Iesu ga lok bok,
“Aba nuunu at ne Moroa kerekngan di.” c
La ga lok bok,
“Nenia na, ak lox eburu mi limixin ne Moroa ga raba ia midi.” d
14I ruturun do nedi luvuttadi mun, la kerepmo ne Iesu ga vee radi xusu at lanmet teren neni naba sele utut kepe lololos at ne Satan, mo ik lok limixin kusu dinak marat at lanmet. 15Ketla ne Iesu ga lox asepmus di basinge loxokoxo at ne Satan, mila at lorooro axap atdi xeneng ap mo loxokoxo, digak marat at lanmet. 16La na nedik ta ven kibis i do neni goxo vot ti lok tooro lubung angelo, ketla neni ba lok tooro nedi di ruuna lunuunu ngan ne Abaram. 17Kuren la na lavasuun teren la neni ga vee radi at lorooro axap teren ngan luvutneton kusu neni ba ravasu ngan laradi ga umsu mi lebelemumu la laradi ruturun at lugugu at lamaasa gomgo ri ne Moroa, la ga ravasu ngan laxaavuk kusu ne Moroa na doxoma xepe laxakapmek at limixin. 18Neni xa ga xip lumumuat at loxonaleng ne Satan ga lok tong pen i, ketla ne Iesu goxo subu, kuren la neni i epovo na lok tooro nedi di ekip tangarang mi leveloklok tong pen.
Copyright information for
MMX